2018-19 Mizoram Budget pharh tawk chu ram hmasawnna hna thawhna tumna aia vote zawnna budget ni zawka an ngaih thu Prism party-in an sawi. He Budget hi mipui mamawh phuhruk tumna budget nia an ngaih loh thu an sawi a, chhungkaw tam takin harsatna an tawh phah mekna zu nasa zawka zawrh tum ni ngeia ngaih theiha zu chhiah tam zawk hmuh beisei a ni chu tha lo an tih thu te, zu khuahkhirh kawngah Sorkar a inthlahdah dawn nia ngaih theih tura Excise and Narcotics Department enkawl na tur sum tlem zawk dah a ni te chu \ha lo an tih thu an sawi. Prism chuan, chhiah tam zawk khawn tum niawm taka a lan laia a khawntu ber Taxation Department tana pawisa dah tlem a ni te, mipui hriselna leh hri danna lama inthlahdah tumna nia ngaih theih tura Health Department tan pawisa dah tlem a ni te, ran hriselna leh hri danna pek pawh an inthlahdah dawn nia ngaih theiha AH&Vety Department tan pawisa dah tlem a ni te, thingtlang hmasawnna lama hnathawktu RD Department pawh pawisa pek tlem a ni te, Electric bill nasa taka tihpun a nih dawn laiin a enkawltu P&E Department tana pawisa dah tlem a ni te, NEDP leh NLUP hmanga hna thar siam nasat tum thu a nih thu tarlan a nih laia a buaipuitu tur Co-operation, Commerce and Industries leh Labour, Employment, Skill Development and Entrepreneurship Department te pawisa tlem zawk pek an ni te, kawngchhia vanga mipui \ap thawmin sorkar rilru a khawih loh zia tilang chiang tura PWD chu nikum aia sum pek tlem an ni chu \ha lo an tih thu an sawi a. Hetihlai hian nawmchenna lam hawi nia ngaih theih tura Legislative Assembly, GAD leh SAD-a sum dah tam a ni te, \halaite laka vote zawn nana Sports budget a let deuh thawa tihpun a ni leh hmun kilkhawr zawka vote zawnna atana District Council tana sum dah a pung nasa tih sawiin, mipui phurrit belhchhah turin sum puk belh nasat tum a ni thunga, nakkum 2018-19 kum tawpa Mizoram leiba tur chu cheng vbch 7887.04 zet a ni dawn tih a sawi. Heng thil awm dan hrang hrang a\ang hian nimina Finance Minister-in kum 2018-19 atana Mizoram budget a pharh taka chu mipui tana hnathawh tumna lam aiin rorellai pawl insawhnghehna leh vote zawnna atana siam nia a lan thu Prism chuan an sawi a ni.
