A thlawna thisen pek inzirtirna ni, National Voluntary Blood Donation Day chu ram chhung hmun dangte rualin Mizoramah pawh hman a ni a, Aizawlah chuan he ni hi Mizoram State AIDS Control Society, Association for Voluntary Blood Donation leh Aizawl Civil Hospital Blood Bank \angfawp huaihawtin Govt. Hrangbana College Golden Hall-ah hman a ni.

A hawnna inkhawm chu MSACS Project Director, Dr. Lalmalsawmi Sailovin a kaihruai a, National Health Mission Director, Dr. Lalrozama’n a hmanpui a ni.
Report a\anga a lan danin, sorkar kum kalta 2017-18 chhung khan Mizoram pumah thisen unit 26,248 pek a ni a, chu’ng zinga unit 21,880 chu pek bik nei lova a thlawna pek a ni a, heng zinga za zela 59.44 chu páwl hminga pek niin, za zela 23.92 chu mimal pek a ni thung. Tun sorkar kum hman mekah kumin April thla a\anga August thla thleng khan thisen unit 11,461 pek a ni tawh a, chung zinga unit 9,532 chu a thlawna pek a ni a, blood donation camp \um 183 neih a ni tawh a ni.

He ni hawnna inkhawm neih zawh hian Aizawl Civil Hospital Blood Bank leh Govt. Hrangbana College NSS Unit bultumin zirlaite’n thisen unit 200 an pe nghal a, a petute mipa 134 leh hmeichhia 66 an ni. He ni hi District khawpui dangahte pawh hman a ni a, thisen pek rûnpui an huaihawt nghal bawk a ni.

Kumina National Voluntary Blood Donation Day-ah hian thupui atan ‘Hlimna hi thisen pek a\angin a lo awm’ tih hman a ni.