Afghanistan-a Helmand province-a thih chilh bomb puakah mi 13 thi

Afghanistan-a Helmand province-ah nimin khan Taliban mi firfiak pakhatin thih chilh bomb hmangin Afghanistan sipai motor a bei a, mi 13 an thi a, midang eng emaw zat an hliam. Helmand province Governor thupuangtu sawi danin, Nawa district-a Afghan National Army motorin dawr pakhat a tlan pel laiin mi firfiak hian bomb hmanga hnawh khah motor a tipuak a, he inbeihnaa thi zingah hian civil mi leh sipai eng emaw zat an tel a, mi dang 19 vel an hliam bawk. Taliban mi firfiakte chuan Whatsapp kaltlangin bomb tipuaktu hi an pawl member zinga a mi niin an sawi a, puan tawh angin, kar kalta khan Helmand province khawpui, Lashkar Gah-a police pisapui bula motor dinnaah Taliban mi firfiak pakhatin thih chilh bomb a tipuak a, he thil thlengah hian civil mi 5 an thi a, mi dang 25 vel an hliam a ni.