Afghanistan-a hmun pahniha inbeihna thlengah Taliban hel hovin Afghanistan Police 22 an that. Kunduz Province police hotu, Abdul Hamid Hamidi sawi danin, nimin zing khawvar hma khan Afghanistan hmar lama Khan Abad district-ah Taliban hel hovin Police hmunpui an bei a, hel ho hian thim thama thil hmuh theihna tarmit, night-vision goggles an vuah nia hriat a ni a, Police officer 13 vel an that a, ral beih nana hman thin, Police motor, Humvee pakhat an ru chhuak bawk a ni. Inrinni pawh khan Afghanistan chhim lama Ghazni Province khawpuiah Taliban hel hovin Police checkpost-ah beihpui an thlak a, Ghazni province Governor thupuangtu chuan he thil thlengah hian Police 9 an thi tih leh mi dang 2 an hliam tih a sawi a, hel 12 an thi niin a sawi bawk. Afghanistan Defence Ministry thupuangtu chuan Taliban hel ho hian Police-te hnen atangin Humvee eng emaw zat an ruk sak tawh niin a sawi a, motor hi thih chilh bomb hmanga Police leh sipaite beih nan an hmang thin niin a sawi a ni.
