Aizawl- Champhai kawnga Tuivawl kama lei min che zui zel vangin lirthei tlan hun siama hna thawh a ni. Saitual SDO (Civil) Pu R Vanlalsawma chuan he National Highway Number 6 enkawltu PWD hnuaia hna thawkten hna an thawh theih nan motor kal hun vawiin atanga hman tan tur a siam a, Champhai lam atanga Aizawl pan tan chhun dar 12 atanga chawhnu dar 12:30 thleng, Aizawl atanga Champhai pan tur tan tlai dar 4:30 atanga a tuk zing dar 9 thleng he kawng hi hawn a ni a, kawng khar chhung zawng hian he leimin a lei tawlh zel tur venna Benching siam hna thawh a nih bakah, kawng chhuat diak leh nem laiah lung phah hna thawh a nia, kawng thlang lam, Tuivawl kama Pu Lalhmuzuala huan a lei vung nawr thlak pawh Tuivawl-ah nawr thlak thin a ni bawk a ni. He lei min hi ruah sur nasat apiangin a tawlh zui zel avangte, a chhak lama 132 KV Power Line thlunna electric ban lian chu tlu mai thei tur a nih vangte in harsatna an nei niin PWD hotute chuan an sawi a, kawng siam tlang reng turin JCB leh hnathawktu an dah reng a ni.
