Aizawl-Thenzawl-Lunglei World Bank kawnga Tlawng lui leh Pukpui inkara a chhe zual lai cement concrete-a siam tur chu tha taka zawhfel a nih dan tur vawiin khan Lunglei Bawrhsap, Pi Lalzarmawii hovin a Pisaah sawiho a ni. Hetah hian Lunglei District SP, PWD hotute leh Lunglei Thalai Pawlte bakah kawng siam hnathawktu Tantia leh SLT Company te an tel a, he inkhawmah hian Lunglei Bawrhsap chuan kumina ruahtui tlak hma ngeia hmanraw tha tak hmanga he kawngpui hi siam tum turin hnathawktute a chah a ni. He kawngpuia a chhe zual lai Rigid Pavement-a siamna tur hian Rs. 2,00,00,000/- ruahman a ni a, he hna hi tun thla ni 10 atanga thawk tanin thla tawpah zawh hman tum a ni a, hnathawh kal lai tihbuai a nih loh nan he kawngah hian lirthei eng chi mah tlan tir phal a ni lo ang.
