Smbhav summit-a tel tura New Delhi-a cham mek, Jeff Bezos chuan India rama thil siamte ram danga zawrh chhuahah, kum 2025-a a hlutna US dollar tluklehdingawn 10-a a pun nan Amazon chuan khawvel pum huapin hma a la dawn tih a sawi. Tun hnaiah ram chhunga retail-a sumdawngte an inel nasa hle a, ram chhunga sumdawngte hum nan ram dang sumdawngte lakah dan khauh tak siam a ni a, hetihlai hian Bezos chuan India rama an company hmasawn nan hma a la mek bawk a ni.
Amazon CEO Jeff Bezos-a’n Delhi a thlen hma lawkin The Competition Commission of India hnathawh dan duan a ni a, sumdawnna lian lutuk lo neitute chuan lungawi lohna lantir an tum tih an puang bawk.
Fair trade regulator chuan Amazon leh Flipkart-in a man pangngai aia tlawm zawka an zawrh te, duhthlan theiha bungrua an chhawpchhuah te leh khuahkhirhna dan hmanga an bungraw zawrh an dah hrante chu sumdawnna kawnga inelna kalh a ni a, enthlithlai a ni dawn tih a sawi. US-a hmunpui nei internet hmanga sumdawngtu lian tak, Amazon hian India rama sum a peipun nan US Dollar tluklehdingawn 5.5 a dah a, India ram chu an sumdawnna \hanlen nan ram pawimawh takah a ngai a ni.
