Bairabi leh Sairang inkara Rel kawng km 50 leh metre 725-a thui siam hna thawh mekah hna za zela 60 vel thawh zawh tawh a ni. He rel kawng siam mek hi Zonet team chuan Inrinni khan a tlawh a, Northeast Frontier Railways Construction-a Deputy Chief Engineer, Pu Hari Singh leh Senior EE Pu Malay Baruah ten an lo dawng sawng a, Sairang rel Station hmun tur a\anga en \anin Mualkhang Station tur thleng an enpui a ni. A enfiahtu ZONET Palai sawi danin he rel kawng hi Bairabi a\angin Tlawng lui dung zuiin Tlawng kam chhak lampangah zel Sairang thlenga siam mek a ni a, Mizoram hi tlangram chhengchhe tak, tlang te tak te te leh kawr thuk tak tak awmna ram a nih avangin rel kawng siam hna thawhah pawh hian rel kawng kalna tur lamlian lian tak laih hna te, ruam leh hmun hniam lai hnawhkhah hna te, mual tan leh tlang hnuai leiverh hna te leh lei dawh hna te chu tuna thawh mek zinga a hautak deuh deuh te a ni. Sairanga Rail kawng lut tur hian Aizawl lam a\anga kala Sairang luh dawn hnaiha Airport kawngpeng bulah National Highway 54 a tan tlang ang a, chuta \ang chuan chhim lama kalin a piah lawka Sihhmui chung zawn ram pharh zau takah a tawp ang a, chumi hmunah chuan Rail Station \ha leh changtlung tak siam a ni dawn a ni. Rail Station siamna turin ram zau tak laih zawl a ni tawh a, chutah chuan Rail Station building tur pawh sak \an a ni a, hetah hian Passenger tan Platform 3 leh bungraw phur chi rel tan Platform 1 siam a ni ang a, Aizawl lam leh Sihhmui lam luhna tur kawng pawh a awm dawn bawk a ni. He rel kawng siam mekah hian tun dinhmunah rel kawng kalna tur laih hna za zela 90 vel zawhfel tawh a ni a, rel kawng kalna tura leiverh hmun 31-a awm te pawh za zela 95 zawhfel tawh a ni a, sum hman tura kum 2008-2009-a ruahman Rs. 23,84,34,00,000/- zinga za zela 50 chuang hmanral tawh niin Engineer te chuan an sawi a ni. Leiverh zinga sei ber Bairabi bula mi chu km 1 leh meter 826 a ni a, a dawttu Sairang Rail Station bul ami chu km 1 leh meter 370-a thui a ni a, leiverh zawng zawng sei zawng belhkhawm hi km 12 leh meter 116 a tling a ni. Leiverh bakah hian lei tan a chung khuha leiverh anga siam hmun 13-ah a awm bawk a ni. Puan tawh angin he rel kawng hian Cachar District a\anga Bairabia thlenga rel kawng siam tawh, Chief Minister, Pu Lal Thanhawla’n kum 1991-a a hawn tawh a thlun zawm ang a, he rel kawng hi a tirah chuan rel te chi kalna metre guage rel kawng a ni a, kum 2016, March ni 21 khan rel lian chi kal theihna tura broad guage rel kawnga siam chu Prime Minister, Pu Narendra Modi-an a hawng a ni. Bairabi leh Sairang inkara rel kawng siam hna thawh mek chanchin hi zanin dar 8-ah Zonet Zawlbukah channel-ah tih chhuah a ni ang.
