Tunhnaia Bairabi Zophai buaina thlenga Assam Police kut tuar Mizoram Journalist 8 te I&PR Department in vawiin khan an thla a hual. Hemi puala inkhawm I&PR Auditorium a neihah Information Minister Pu Lal Thanzara chuan, Buaina thlengah Journalist te chu kut tuar lo tura ngaih an nih laia Assam Police ten kut an thlak chu a dem thu a sawi a, hetihrual hian mahni nunna thapa mipuite thu thar ber ber hriattir tumtu Press mi kuttuar te chu chhuanawm a tih thu a sawi. Pu Lal Thanzara chuan, he thil thleng chungchang a a lungawi loh thu pawh Assam CM hnenah lehkha a thawn tawh thu sawiin tunthla ni 20 a State pahnih CS te inbiakna turah pawh Mizoram CS in a sawi chhuah tur thu a sawi bawk. Agriculture minister Pu KS Thanga pawhin thusawiin Journalist te chunga Assam Police te chet dan chu India Democracy ropui tak timualphotu a nih thu sawiin Press mite zalenna rahbehna nasa tak a nih thu a sawi. MJA President Pu Vanlalrema Vantawl pawhin thusawiin an member te chunga thil thleng chu an dem thu leh hemi chungchanga an lungawi lohna hi Prime Minister, DoNER Minister, Information and Broadcasting ministry, Press Council of India leh National Human Rights Commission ah te an thlen thu a sawi. Inkhawm hi I&PR Director Pu David L Thangliana’n a kaihruai a, I&PR Secretary Pu Lalbiakthluanga, MJA member leh I&PR Officer te an tel a ni.
