Home Minister Pu R Lalzirliana’n sa tawh lo turin ngen mahse, Bairabi Zophai hmuna Zofate Chawlhbuk naktipa sak nawn an tum chu an thulh dawn lo tih MZP President, L. Ramdinliana Renthlei-in a sawi.
Vawiina Aizawl Press Club-a thuthar lakhawmtute a kawmnaah MZP President chuan an pawl Executive Meeting-in a rel angin, Bairabi Zophai hmuna Chief Minister hlui, Pu Ch. Chhunga nupui Pi Lalrothangi ram a pekah kumin February ni 27 khan Chawlhbuk hi an sa tih a sawi a, hei hi a zan la lain Assam Police leh Forest Deparment mite nia hriatin an tichhe leh nghal a ni a ti. He thil thleng chungchangah hian a tuk February ni 28-ah Bairabi-a MZP Sub Hqrs. hruaituten Bairabi Police Station-ah FIR thehlut nghal mah se, vawiin thlenga bawhzui a la ni lo chu mak an ti hle tih a sawi. MZP President chuan, MZP-in Zofate Chawlhbuk a sak tihchhiat a ni chu na an ti hle tih sawiin, February ni 28-a MZP Executive Meeting-in Zofate Chawlhbuk hi sak that leh ni se tih a rel angin naktip, ningani-ah an sa the leh dawn tih a sawi. MZP President chuan, tun hnaia Bairabi khawtlangin Chawlhbuk sak an rem tih loh thu an puan chungchang chu vawiin khan an pawl Adviser hovin Bairabi khawtlang hruaituten an ngaihtuah tha leh nia sawiin, inremna tha tak an siam thei niin a sawi a. He Chawlhbuk sak tur inbuatsaihna atana Seminar an huaihawt tawh thu leh heta political party hrang hrang aiawh kalkhawmte pawhin intanpui an ngaihna laia intanpui tawn an remtih thu Resolution an lo pass tawh thu leh February ni 7-a Bairabi khawtlang hruaitute nen an sawi ho tumah pawh he chawlhbuk sak tur hian Mizoram Sorkar au harh ngei se an duh thu an lo sawi tawh nia sawiin, he Chawlhbuk sak tur chungchanga Bairabi khawtlangin tun hnaia thuthar an nei chu mak an ti hle tih a sawi. Bairabi Zophai hmuna Zofate Chawlhbuk sak an tum chungchang hi vawiin khan Home Minister, Pu R. Lalzirliana’n a pisa-ah a sawipui thu leh sa tawh lo tura a ngen thu MZP President chuan a sawi a. Home Minister ngenna chu zahawm viau mah se, Chawlhbuk sak chu MZP Executive Meeting-in a rel a nih thu leh Committee thurel chu an tih danglam theih a nih loh avanga kaltlangpui a nih tur thu Home Minister hi an hrilh tih a sawi a, tunhma atanga Assam nena ramri-a buaina a chhuahin Assam lamin Police an hmatheh zel laia, Mizoram Sorkar-in chet a la ve ngai lo chu tha lo an tih thu leh Sorkar chu ramri chungchang ngaihven ve deuh tura an duh thu pawh MZP President chuan a sawi bawk. Bairabi Zophai hmuna MZP-in Zofate Chawlhbuk sak leh a tum chu inrinnia Bairabi khawtlang hruaitute kalkhawm chuan tha an tih loh thu an sawi a. MZP-in ramri humhalh an duhna chu an thlawp rualin, ramria awm an nih avangin buaina thlen thei zawnga hmalak chu tha an tih loh thu an sawi a. Ramri chu an humhalh duh a nih pawhin Chawlhbuk sa zawnga ti lovin, Inner Line Reserve hmun thenkhat chu Mizoram Sorkar-in a enkawl ve theih nan tanlak ni zawk se an duh thu an sawi a ni.
