Bangladesh Court-in an PM hlui thah tuma puh mi 11 thiam loh chantir

Bangladesh court chuan nimin khan kum 1989-a PM Sheikh Hasina-i thah tuma puh, mi 11 chu kum 20 lung in tang turin a hrem a, Bangladesh chanchinbu, Dhaka Tribune tarlan danin, he thubuaia thiam loh chantir mi 11-te hi kum 1975-a Bangladesh President hmasa ber leh Pi Hasina-i pa, Bangabandhu Sheikh Mujibur Rahman-a thah a nih chungchanga inrawlhna thuk tak nei, Bangladesh Freedom Party member an ni a, court chuan kum 28 kaltaa khatih laia eptu pawl hruaitu, Pi Hasina-i chenna in bomb hmanga an beih avangin damchhung lung in tang tura a hrem bakah, Bangladesh pawisa, Taka 20,000 theuh chawi tir bawk a ni. He thila inhnamhnawiha puh zinga mi, Humayun Kabir-a chu thubuai-ah hian a inhnamhnawih ngei tih finfiah theih a nih loh avangin chhuah zalen a ni a, Bangladesh sorkar ukil, Abdullah Abu chuan court thutlukna chu lungawi thlak a tih thu sawiin, Pi Hasina-i thah an tumna chu kum 1975 August ni 15-a an chhungkua suat tumna kal zel a ni tih a sawi a ni.