Spain ram Police ten kar kal taa Barcelona khawpuia motor-a mi 13 chil hlumtu, Van khalhtu chu an hre chiang tawh tih vawiin khan an sawi a, hliamte chu Barcelona-ah enkawl mek an nih thu an sawi. Puan tawh angin, Ningani kal ta khan motor, Van var pakhat chuan Barcelona-a Las Ramblas district-ah khawlaia ke-a kalte a pawng chil chiam a, mi 13 a chil hlum a, Police-te chuan he thila mawhphurtu ber, Morocco-a piang, kum 22 mi, Younes Abouyaaqoub hi France ramri thlengin an zawng zel tih an sawi a, he thila inhnamhnawiha hriat, mi dang 11 nen an la zawng mek tih sawiin, kawng tinrenga an chhui pawhin an mi zawn hi Younes Abouyaaqoub-a ngei niin a lang vek niin an sawi. Amah hi Spain ram chhungah a la awm nge, ramri kanin ram dangah a lut tawh tih pawh hriat a ni lo tih police hotu, Josep Lluis Trapero chuan a sawi a, he thil thleng kaihhnawiha man leh kah hlum pawh an nei nual tawh a ni.
Chanchin Thar Barcelona khawpuia motor-a mi 13 chil hlumtu hre chiang tawh
