BJP Mizoram Pradesh President Prof. JV Hluna chuan Maraland Democratic Front (MDF) chu BJP-ah a inchhung lut thuai dawn niin a sawi. Vawiin-a Lunglei Circuit House-a thuthar thehdarhtute a kawmna-ah he thu hi sawiin Prof. JV Hluna chuan hemi chungchangah hian MDF hruaitute nen inremna thuthlung mumal tak siam a ni tawh niin a sawi a, kumin September thla-ah Union Minister hovin Siaha-ah inlawmluhna inkhawm neih tum niin a sawi. Hetih lai hian MDF President Pu M Laiko pawhin ZONET zawhna chhangin an Party chuan BJP zawm turin thutlukna a siamfel tawh niin a sawi a, an zawm hun tur erawh chu Central-a an party hruaitu lo zin theih hun hmasaah a ni dawn niin a sawi a ni. Prof. JV Hluna chuan India ram mipui tam tak awm zinga zaa 70 zet chu BJP leh a thawhpui te niin a sawi. Tukina Lunglei Circuit House-a Press Conference a neihah BJP President chuan tun dinhmunah India rama mihring awm zawng zawng zinga za zela 8 vel chauh Congress leh an thawhpuite chu a ni tawh niin a sawi a, hetiang hi ram puma thil awm dan a nih mek laia Mizo mipuite zingah Congress party lamtanga an la awm tlat chu thil vanduaithlak tak niin a sawi a ni. Tunhnaia Chakma leh MZP inkara thil thleng chungchang sawiin Prof. JV Hluna chuan an Party hruaitute chuan ngaihtuahna seng hmasa-in thu an sawi thin niin a sawi a, nakkum Assembly inthlan lo awm tur thlir a ngai tih sawiin Chakma te hian Independent Candidate MLA atana thlan tlin an neih pawhin sorkar laipuia thusawitu an nei tawh dawn tihna a niin a sawi a, a bik takin Aizawl leh Lunglei-ah BJP MLA sorkar laipuia Mizote aiawha thusawitu tur Mizoram in a mamawh hle niin a sawi a ni. Prof. JV Hluna chuan dan anga Mizorama Chakma lo awm nghet tawhte chu thiana siam a, Bangladesh atanga dan lova lo luh tum te erawh chu dodal tura ke pen a ngai niin a sawi a, BJP Mizoram Pradesh hmachhawp zinga pawimawh tak chu Chawngte-a Police Training Centre siam a, Mizo tlangval sang chuang zet dah a, ram venhim hna thawh tir niin a sawi a ni. Prof. JV Hluna chuan State sorkar ten Parliamentary Secretary an dahte Supreme Court in paih vek tur a tih avangin Mizoramah Congress sorkar a buai hle niin a sawi a, Minister ang chiaha sorkar File kalphung engkim an hriat tawh avangin MLA leh Parliamentary Secretary zingah a in chhawk a Minister nih duh an awm a hei hian an hruaitute rilru a tibuai hle niin a sawi a ni. Prof. JV Hluna hian tunlai hian khaw hrang hrang tlawhin an Party tihchak dan tur a zawng mek a, Thorang bialah Unit thar 16 a din tawh niin a sawi a ni.
