BRD Medical College-ah ni 3 chhungin nausen leh naupang 61 thi leh

Chawlhkar thum vel liam taa naupang 60 chuang thihna hmun, Uttar Pradesh-a Gorakhpur-a damdawi in, Baba Raghav Das Medical College-ah ni 3 chhungin oxygen indaih lohna leh natna hrang hrang avangin nausen leh naupang 61 an thi leh. BRD Medical College damdawi inah hian darkar 24 chhungin nausen leh naupang 19 an thi a, heng zingah hian thluaka khawsik lut, encephalitis avanga thi naupang 4 vel an tel a, a bak zawng hi chu nau piang hlim, ngaihtuahawm zualte awmna, neo-natal intensive care unit-a thi an ni. Damdawi in thuneitute chuan Inrinni leh Pathianni khan nausen 16 an thi tih a sawi a, state CM, Yogi Aditynath-a bial, Gorakhpur-a damdawi in lian ber, BRD Medical College-ah hian state chhunga district hrang hrang, Bihar leh Nepal-a mi, damlo eng emaw zat an awm a, thluaka khawsik lutte enkawlna ward-a doctor pakhat sawi danin, tunlaia ruah sur nasa leh tui lian avang hian naupang damlo an tam phah hle a, hei vang hian damdawi ina harsatna thleng mek pawh hian ziaawm lam a pan theih loh phah a ni. Nimin khan BRD Medical College principal hlui, Dr Rajeev Mishra-a leh a nupui, Dr Purnima Shukla-i te chu UP Special Task Force-in an man a, puan tawh angin, he damdawi ina vanduaina thlengah khan Mishra te nupa hi mawhphura puh an ni a, an lakah hian FIR thehluh a ni.