Ruihhlo hal hma inkhawm-ah Chief Minister hian India rama ruihhlo ngawlvei te enkhawlna lian ber Mizoramah din tum a ni a ti a. Ruihhlo do chu Mizoram mai nilo khawvel pumin a buaipui a, nunna tam tak suattu a nih avangin sum siamna atana ruihhlo hmangtute chu tih tak zeta do an ngai a ni, a ti a. Ruihhlo lo kalna dang turin khawchhak lam ram hruaitute nen pawh inbiak a \ul thu leh ruihhlo do leh a ngawlvei te enkawl chu sorkar hmalak tumna lian zual zinga tel a ni a ti.
Home Minister Pu Lalchamliana pawhin thu sawiin, ruihhlo do tura SRS din chu sorkar pawhin \ha a ti a, police te nena an thawhhona pawh chhunzawm zel a ni ang a ti.
Thusawitu dang Excise and Narcotics Minister Dr. K. Beichhua chuan ruihhlo vanga \halaite kut leh ke tan ngai leh nunna chan an awm \hin chu a lungchhiatthlak a ni a ti a, SRS hmalakna chuan ruihhlo donaah zoram hmathlir a ti eng a ni, a ti.
Central YMA President Pu Vanlalruata chuan ruihhlo chu tanrual pawh a do hneh har tak a nih thu sawiin, \anho loh phei chuan do hneh ngaihna awm lo a ni a ti a, SRS ten ruihhlo an dona kawnga chetsual chang an neih chu an inhriat thu sawiin, insiam\ha tura \an an lak thu a sawi. Ruihhlo vanga Mizo \halai mi 1500 chuang an thi tawh chu thinrimna tham a ni a ti.
Ruihhlo hal hma inkhawm hi Central YMA General Secretary Lalhmachhuana’n a kaihruai a. Kumin April ni 3 atanga tun thlengin SRS batch kua-nate hian ruihhlo cheng nuai 82 sing 1 sang 7,625 hu an man tawh a, Heng zingah hian Heroin hawng 122 te, Trama + AP strip 15,726 te, Ganja Kg 15 leh khuh damdawi ruihna atana hman \hin bottle 499 te chu a tam zual niin, heng ruihhlo-a inhnamhnawih hi mi 852 an ni a, an zinga 47 chu home-a dah an ni a, 66 chu Excise kuta hlanin, mi 19 chu police kuta hlan an ni.
