Khawthlangtuipui group YMA huam chhung tlawh tura ruat Central YMA hruaitu 6-te hian nizan khan Tlabung an thlen hnu-ah, khaw chhunga YMA branch hrang hrang hruaitute an kawm nghal a, tha thlah lova ram venhim hna thawk chhunzawm zel turin an ngen a ni.
Vawiin khan khaw pawna YMA branch thenkhat an tlawh bakah, ramri dep boruak thlithlaiin ram pahnih inrina hrul an fang kual a, anmahni lo dawngsawngtu Khawthlangtuipui Group YMA hruaitute chuan, ramri-a sipaiten venhim hna an thawh dan tlangpui an lo hrilhfiah a, India leh Bangladesh inrina bawr vel chu a him zel theihna turin, tun aia Sorkar-in a ngaihsak zawk a pawimawh tih an lo hrilh a ni.
Central YMA hruaitute hian, Tlabunga kan corr. zawhna chhangin, tun tuma ramri an tlawh atanga an thil hmuh dante chu ngun zawka la sawiho tur a nih thu leh, nawr zui ngai thilte a awm a nih chuan a tul anga an bawhzui tur thu an sawi a, YMA branch hrang hrang hnenah hian silpaulin leh tangkafai an hlan theuh a ni.
