Sairang leh Mualkhang inkara Changsil kai bula tun thla ni 29, Thawhlehnia truck chesual, Tlawng luia tla luta chuang, mi pahnih, chin hriat lohva bo ta Assam-a Patharkandi lam mite chu zawn zui zel an ni. Heng mite hi Tlawng luiah an tla hlum nia rin a nih avangin an chhungte leh thiante bakah Sairang Dinthar Branch YMA te, Hortoki Branch YMA te leh Bairabi khaw miten an zawng zui zel a, vawiin chawhnu thleng khan an la hmu lo a ni. An tlak ni hian Tlawng lui tui a nut avang leh tlema a len deuh avangin zawn a harsa niin YMA hruaitute chuan an sawi. He truck, Tlawng luia tla lut hi nimin tlai khan Transport Deptt. Crane leh Ophel Crane hmanga hnuh chhuah a ni a, Sairang Police Station kawtah dah rih a ni.
