Chhattisgarh-ah Maoist hel pawlte’n police bang pakhat kaphlum, lirthei 10 chuang hal

Chhattisgarh-ah Maoist hel pawlten nizan khan police bang pakhat an kaphlum a, lirthei 10 chuang an hal bawk. Police-te sawi dan chuan hel pawlte hian bus tlan lai tidingin, a chuang zing ami, Munna Sodi chu hnukchhuakin an kap zui a, midang chuang ve te pawh chu chhuk tura ti lehin, bus chu an hal zui a, lirthei dang lo tlan paruk leh truck pahnih leh bus dang pahnih an hal chhunzawm leh a ni. Thuneitute chuan Maoist hel pawlte chet dan hi mimal inhuatna lam rawngkai thil a nih bakah, phuba lakna a ni an ti a, pawi an khawihna bul velah hian lehkha-ah kar kalta zirtawpni-a an pawl hruaitu leh midang 9 kahhlum an nih vanga phuba la an nih thu inziak te pawh an chhar tih an sawi bawk a ni. Hel pawlte kahhlum, Sodi hi kum 2012 khan a nupui thahnaah inhnamhnawihna neia puh a nih vangin man a lo ni tawh a, police a nihna hlihsak a nih hnuah, kum 5 lung-inah a tang a, nikum khan a chhuak chauh a, a nupui unaupa hi Maoist hel pawl zingah a tel ve nia sawi a ni bawk a ni.