Institute of Advanced Studies in Education, IASE, Republic venga Ph.D. leh M.Phil zirna hawnna inkhawm vawiina neihah thu sawiin Pu Zoramthanga chuan, zirna sang zawk neih theihna tura Pd.D leh M.Phil zirna hawn belh a ni leh, pianphunga rualbanlote tana chet awlsamna tura Lift dah thar a ni chu lawmawm a tih thu a sawi a, sorkar pawhin zirna leh hriselna lam a ngaihpawimawh thu sawiin hma pawh a la a ni a ti. Pu Zoramthanga chuan, zirna chu ei hmu tura mihring buatsaihna piah lamah thiamna tak tak intuh a, mahni inringtawk, mihring hmantlak leh \angkai chher chhuahna tur a ni a ti a, Mizoramin hmasawnna rahbi tuk tura hmanraw \ha tak a neih, mipui chawm zo khawp ram zau leh \ha, sik leh sa nuam, ruahtui \hahnem tak te chu \angkai taka hmang tur chuan a chhung a cheng mihringten tumruhna leh thahnemngaihna nen an thawh a ngai tih a sawi a, ram hmasawnna atana an hmalaknaah mithiamte chu thawhpuiah a sawm a ni.
Ph.D leh M.Phil zirna hawn tharah hian batch hmasa berah Ph.D zirlai 7 leh M.Phil zirlai 4 an awm a, hemi rual hian pianphunga rualban lote tana chetvela awlsamna tur Lift pawh Chief minister hian a hawng nghal a, hei hi sorkar laipui hmalakna Sugamya Bharat Abhiyan hnuaiah Social Welfare Department kaltlangin Rs. 41,03,207 senga siam a ni. IASE hi kum 1975 khan Mizoram Institute of Education tia bul \an a ni a, Kum 1997 khan College of Teacher Education (CTE) ah thlak a ni a, kum 2005 khan IASE a hlankai a ni. IASE Mizoram hi rampuma B.Ed zirtirna Multi-mode programme kalpui awmchhun a ni bawk.
