Chief Minister hian vawiin khan Thenzawl AH&Vety Farm-a Kel lian chi vulh punna hmun tlawhin hmalak mek dan a enpui a, harsatna dang engpawh lo thleng se, ei leh bara intodelh chu mipui tawrhna ti ziaawm theitu a ni a, sum leh pai dinhmun siamtha a, hmasawn zel turin intodelh a pawimawh hmasa ber a ni a ti a, lo neih leh a kaihhnawih, agriculture, horticulture leh ran vulh lamah ngawrh zawka hmalak thar a tul a ni a ti a. Mizoram chu leilung behchhan-a eizawnna kalpui theihna, ram zau tak, a chhunga chengte chawm zo, sik leh sa leh ruah tui duhthusam a nih avangin hemi kawngah hian hlawhtlinna sang tak a hmuh theih dawn a ni a ti.
Thenzawl-a Kel lian chi vulh punna hmun, Goat Breeding Farm hi NABARD-RIDF hnuaia sum hmuh hmanga siam a ni a. Rajasthan leh Punjab atangin kel chi tha 83, Sirohi leh Beetal te chu nikum April ni 11 khan lakluh a ni a. Kumin May ni 26, khan 97 lakluh belh leh a ni a, tunah hian a note 21 hralhchhuah tawh a ni.
Chief Minister hian Vety Farm-a sial vulhna tur buatsaih mek leh Thenzawl Farm-a Dept hmalakna dangte pawh a enpui a, AH & Vety Minister Dr. K. Beichhua, Veterinary and Fishery Board Vice Chairman Pu C.Lalmuanpuia, Adviser to CM Pu C. Lalramzauva leh AH & Vety Dept hotuten an zui a ni.
