Thingtlang khuaa awm, mi rethei chenna in nei lo leh di ina khawsa te tana in thar sakna tur leh in chhe tawh thawmthatna tur Chief Minister’s Rural Housing Scheme chu LAD Minister, Pu PC Lalthanliana’n vawiin khan Lungleiah a hawng. Hawnna inkhawm Lunglei Convention Center-a neihah thusawiin LAD Minister chuan he hamthatna hi a phu leh a dawng tur dik tak ten an dawn theih nan anmahni bialtu BDO leh khawtlang hruaitu VC ten duhsak bik nei lova a dawngtu tur dik taka an thlan a ngai niin a sawi.
LAD Minister chuan khaw hrang hrang VC te chu thuneihna sang zawk leh tam zawk pek theihna turin sorkarin ruahmanna a siam mek niin a sawi a, chutiang dinhmun sang zawka hlankai an nih huna an mawhphurhna tha taka hlen chhuak thei turin an inbuatsaih lawk a tul tih a sawi bawk a ni. He inkhawm Lunglei Bawrhsap, Pi Lalzarmawii’n a kaihhruaiah hian DRDA Project Director, Pu K. Lalrohlua chuan CM’s Housing Scheme siam dan leh hman dan tur a sawifiah a, zawhna awmte a chhang nghal a ni. NEDP hnuaia siam Chief Minister’s Rural Housing Scheme hi Mizorama District 5, Champhai, Lunglei, Kolasib, Mamit leh Aizawlah te in 2,000 sak nan hman a ni ang a, he scheme hnuaia hamthatna dawngtute chuan Rs. 50,000/- theuh an dawng ang a, hei hi a intahtawlin installment thumah pek chhuah a ni dawn a ni. Lunglei District-ah chuan he scheme atang hian chhungkaw 619 thlan chhuahte tanpuina pek a ni ang.
