MNF President, Pu Zoramthanga’n Citizenship Amendment Bill, 2016, Parliament pass tir tum mekna chu an party-in a tawp thlengin do a tum niin vawiina an party chhung inkhawm, Mizo Hnam Run-a neihah a sawi a, tuna dan hman mekah ram dang mi, India rama lo lutte, ram khua leh tui an nih theih nan kum 11 tal, India ramah an awm a ngai a, hei hi kum 6-ah tihtlem tumin Parliament Committee-in a buaipui a, hei hi Parliament thlasik thutkhawma pass theih tura chhawp chhuah tum nia sawiin, hei hi Mizoram chauh ni lo, hmarchhak bial tan a him lo hle niin a sawi. Pu Zoramthanga chuan, Citizenship Amendment Bill hi pass a nih loh nan an party-in a tawp thlenga dodal tum mah se, party mal chauha dodal chu a tawk zawh dawn loh avangin hmarchhak state hrang hrangte nena tan tlan dan tur pawh ngaihtuah niin a sawi a, Citizenship Amendment Bill, 2016 hi Parliament-in a pass loh nana dodal turin Mizorama Political Party hrang hrang, Tlawmngai pawl hrang hrang leh zirlai pawl hrang hrangte an tanrual a tul thu sawiin, hemi atan hian Central YMA-in a bul tum se a duh thu a sawi bawk.
