CM, Pu Lal Thanhawla’n Citizenship (Amendment) Bill, 2016 chu Hindu sakhaw vulh len tumna, Kristiante tana thil hlauhawm tak, zu leh drugs ai pawha hlauhawm zawk niin a sawi a, BJP hian Kristian chu an sakhaw pawm loh zinga mi a nih avangin a theih ang angin Kristiante thliar hran an tum a, Kristiante tan Citizenship (Amendment) Bill, 2016 chu pawm theih a nih loh avangin, dodal zel a nih tur thu, vawiina Congress Bhavan-a inkhawmah a sawi a ni. CM chuan Parl. Secretary-te chu dan ang thlapa ruat an nih avangin anmahni enkawlna senso chu rulh nachhan tur a awm lo niin a sawi a, chak zawka sorkar a kal theihna atan leh Minister-ten puitu tha tak an neih a, an Department enkawlte pawh hneh taka an enkawl theih nan Parl. Secretary-te chu ruat nia sawiin, dan ang thlapa ruat an nih avangin anmahni enkawlna senso chu Prism ngen anga sorkar-in a rulh nachhan tur a hriat loh thu a sawi a ni. Pu Lal Thanhawla chuan, Mizoram kawngpui chu Total Bandh huaihawt avanga tha thei tur chu ni se ni tin Bandh huaihawt mai tur nia sawiin, kawngpui chhia avanga Total Bandh huaihawt tum, MNF Party hian an sorkar lai khan kawng tha an ngaihtuah ngai lo niin a sawi a, an hun laia kawng chhiatzia kha ngaihtuah let se, zak ngawih ngawih tur nia a ngaih thu leh, tuna an thil tih tum chu mahni mawng hlimna mai nia a ngaih thu a sawi bawk. He inkhawm hi MPCC General Secretary, Pu Lalrinliana Sailo, MLA-in a kaihruai a, Rajya Sabha member, Pu Ronald Sapa Tlau leh tun hnaia MPCC General Secretary atana ruat thar MLA 3 – Pu Hmingdailova Khiangte, Pu H. Zothangliana leh Pu Nihar Kanti Chakma-in thu an sawi bawk.
