Chief Minister Pu Lal Thanhawla chuan Social Welfare Deptt. buatsaih damdawi hmansual dan leh ruihhlo ngaite dinhmun zirchianna lehkhabu vawiin khan a tlangzarh. He The Baseline Survey on the Extent & Pattern of Drug use in Mizoram tih lehkabu hi Mizoram Legislative Assembly Annexe Conference hall-a inkhawmah Chief Minister chuan a tlangzarh a, thusawiin Chief Minister chuan Baseline Survey on the Extent & Pattern of Drug use in Mizoram tih hi Respondent Driven Sampling behchhana a zirchiangtute’n ruihhlo ngaite leh ruihhlo kaihhnawih a lung in tang mi 2633 an kawmna atanga siam a ni tih sawiin, Social Welfare Department in hun rei tak atangin ruihhlo ngaite enkawl leh buaipui hna a lo thawh tawh thin dante, mithiamte zirchianna behchhana, data tha tak an neih loh avanga hmathlir thui tak neih a harsat thute a tarlang a, International Expert hial ruaia Baseline Survey neih a ni ta chu Social Welfare Deptt., tlawmngai pawl hrang hrang leh sawrkar hnuaia ruihhlo do kawnga hmalakna-ah tangkai takin hman a ni dawn niin a sawi a ni. Chief Minister chuan ruihlo do kawngah leh ruihhlo ngaite buaipui kawnga hmalatu lianber YMA in sawrkar leh Kohhran hruaitute kawm a chak zawka hnathawh dan tur an rel tawh thu a sawi bawk. Chief Minister chuan YMA in ruihhlo a mante lang tlang takin a halral thin chu lawmawm a tih thu a sawi a, ruihhlo mantu dang sorkar Deptt. ten an ruihhlo man tih chhiat hma a, an dah khawm chu him takin kawl a ni em tih hre tur leh pilril palh a awm em tih thleng a hre chiang turin sorkar Deptt. hotute a chah a, ruihhlo zuar mante awlsam taka an chhuak leh mai thin chu tha lo a tih thu sawiin dan anga hremna na tawk pek ngei an nih theihna tura thil tih a tul tih a sawi bawk. Pu Lal Thanhawla chuan ramri kana ruihhlo tawlh rutute man chhuak a hremna pek dan tur pawh ngaihtuah mek niin a sawi a, a tul phawt chuan Chin Hills Chief Minister leh “Chin Hills a Mizo unaute thawhpuia tan sawm an ni ang a ti bawk. Pu Lal Than Hawla chuan Tawngtai Bethel Camping Centre leh Home dang leh Centre thenkhat ten ruihhlo ngaite an enkawl dan chu fakawm a tih thu sawiin nu leh pa mangang ten an fate ruihhlo avanga buai leh an enkawl theih tawh loh an dah luh te chu heng Home te hian engmah phut leh beisei nei lovin an enkawl a, hetih laia sum leh tha seng lo ten tawngkam tha lo tak tak hmanga an bei vak vak chu thil tih chi ni lo niin a sawi bawk a ni. He inkhawma thusawitu dang Social Welfare Minister Pu PC Lalthanliana pawhin Mizoram mai ni lo, ram pum huap pawh a damdawi hmansual nasat a nih dan leh ruihhlo ngaite dinhmun zirchianna lehkhabu Mizoram sawrkarin mithiamte ruaia a siam thei chu a thil tha ngaihtuahna niin a sawi a ni.
