Task Force hmalaknain Police te leh FDA te nen tangkawpin thil man leh supply dinhmun thlithlai reng an rel a, chakkhai phur tur leh ei leh bar atana pawimawh te chu uluk taka enfiah an nih hnu ah ILP pek an ni ang a. Chutiang mi nilo chu ILP pek rih loh tur a ni a, hnathawktu labour tur pawh Mizorama awm mek an nih loh chuan mi thar lut tur chu ILP pek rih loh tur a ni.
Lengpui Airport-a screening tih mek chu uluk leh khauh taka kalpui zel tur a ni a, natna hri pai nia rinhlelh te dah hran a enthlak a tul palha dah hranna turin Lengpui Tourist Lodge chu ‘Quarantine Camp’ atan buatsaih a ni ang.
Loh theihloh thilah lo chuan fimkhur thu hlaah mipuite chu puipunna a tel tam lo tura ngen an ni a. Mizoram pawn a zinchhuah pawh theih chin chinah pumpelh rih turin mipuite ngen an ni.
Natna hri vei hmuhchhuah an awm thuha anmahni hnaiha lo awm te chhuichhuah theihna turin, khualzin phurtu maxi cab leh bus te chu an customer te hming leh biak pawh theihna number leh address kimchang chhinchiah tir an ni dawn a, ramri dep khaw hrang hrangah te mipuite zirtirna khawtlang hruaitute, police, BSF leh Assam Rifles ten an pe dawn a ni.
Mizoramah hian COVID-19 kai hmuhchhuah a la ni lo a. Ramdang atanga lo zin haw, dahhran a enthlak (home quarantined) hi mi 67 awm tawhin, an zinga 6 chu an kai lo tih finfiah a ni tawh a ni.
