Covid-19 Rapid test kit hi sorkar laipui hnenah a man pangngai aia sangin India distributor, Real Metabolics-in a hralh a, distributor leh India rama laluttu inkarah in hriat thiam lohna a awm vangin Delhi High Court-ah thlen a nih hnuah man to taka lei a ni tih hi hriat chhuah a ni.
Indian Council of Medical Research chuan China firm, Wondfo hnen a\angin March ni 27 khan antibody test kit a chah a, ICMR leh Aark Pharmaceuticals ten test kit chah tur hian inremna an siam a ni.
Tun thla ni 16 khan China-a India ram palai, Vikram Misri chuan test kit 6,50,000, Rapid Antibody Test leh RNA Extraction Kit chu India rama thawn a ni tih a tarlang a ni.
Heng test kit te hi India rama laluttu, Matrix chuan China a\angin pakhat Rs.245/-in a lei a, distributors, Real Metabolics leh Aark Pharmaceuticals chuan Rs. 600/-in sorkar laipui an lei tir thung a, pakhat manah zaa 60 an hlep a ni.
Tamil Nadu sorkarin test kit China a\anga lakluh hi distributor hran Shan Biotech a\angin Rs.600/-in a lei a, hemi hnu hian a chahluttu leh sorkara suppply tute inkarah buaina a chhuak zui a ni.
Court chuan he buaina hi a ngaihtuahna hnuah a hlep chu a sang hle tih hria-in test kit chu a lo berah Rs.400/-a tihniam turin a ti a, ram chhung sum deh chhuahna chi hrang hrang a chawlh \hup lai a ni tih court hian sawiin, sorkar chuan ram mipuite himna turin theihtawpin hma a la a, hrileng do let tura a hmatawnga thawkten theihtawp an chhuah bawk a ni a ti a, hetiang boruak karah hian test kit chu a rang lama a man tlawm thei ang bera pek theih a \ha hle tih a sawi.
