COVID 19 hri leng mek a darh loh nana Sorkar laipuiin March ni 22-a mipuite pawnchhuak lo tura a ngenna hlawhtling taka kalpui a nih hnuah Mizoram sorkar chuan mipuite chu kar khat chhung pawn chhuak lo turin a ngen chunzawm a. Hemi hnu March ni 24 zanlai dar 12 a\ang khan ram pumah Sorkar laipui thupekin ni 21 chhung inkharkhip hi chhunzawm a ni a, hei hi vawiin thlenga kalpui chhunzawm a ni a, Mizoram bikah chuan vawiin hi a ni 16-na a ni a, ram pum huap chuan a ni 13-na a ni. Rampum huap inkharkhip hi pawhsei a nih loh chuan ni 21 chhung, April ni 14 thleng awh tur a ni.
Aizawl khawpui veng \henkhatah chuan inkharkhip a nih avanga ei tur nei mumal tawh lo an awm nual a, heng mite hi an awmna Local task Force-in an theih ang anga chhawmdawlin ei leh in tur an ngaihtuahsak hlawm a ni. Veng \henkhatah chuan chhuanchham, ei tur nei mumal tawh lo hi chhungkaw 50 a\anga 100 dawn laite pawh an awm tawh a, tun hnaiah COIVID 19 Medical Operation Team-in tuna inkharkhip kalpui mek bak ni 14 dang inkharkhip chhunzawm tura Sorkar-ah rawtna thlen an tum thu sawi a awm avangin veng \henkhat chuan an huam chhunga ei tur nei lote tan an theih ang angin ei tur an chhekkhawl a ni.
State pawn a\angin vawiin thleng khan Mizoramah ni tin mamawh chi hrang hrang lakluh chhunzawm zel a ni a, Mizorama sumdawnna hmunpui ber pakhat Dawrpui venga sumdawngte chuan bungrua hi dan pangngaiin an chawlut chhunzawm thei tih an sawi a, bungrua pawh an la ngah thawkhat a, Local task Force-ten an mamawh an lam ang chu pekchhuah tur an la nei zel rih tih an sawi hlawm. Veng hrang hrang Local Task Force-te pawhin mipuiten ei leh bara harsatna an tawh loh nan an huam chhung \heuha sumdawngte chu dawr hawn theih hun bituk siamin, mipuiin chakhai an lam theih nan ruahmanna an siam a ni.
