The Mizoram (Containment and Prevention of Covid-19 Ordinance, 2020 hi nimin khan Mizoram Gazette-ah tih chhuah a ni a, ordinance ah hian Covid-19 laka mipui himna tura mipui khuahkhirhna chi hrang hrang leh chung Dan bawhchhiate hrem dan tur tarlan a ni.
Covid-19 kai emaw, a kai nia rinhlelhte nihna pholang thei, an thlalak leh an chanchinte thuneitute phalna nei lova thehdarhtu chu thla 3 lungin tantir leh Rs.5,000 chawitir thlenga hrem theih an ni.
Phalna nei lova sakhaw thil leh vantlang thila punkhawm huaihawttute leh phalna nei lova State ramri kantute chu Rs.5,000/- chawitir theih an ni a, Quarantine emaw isolation emaw pumpelh tumtute chu Rs.3,000/- chawitira hrem theih an ni a, a hun hmaa quarantine emaw isolation emaw chhuahsan lui an awm chuan Rs. 1,000/- aia tlem lo, Rs.5,000/- thleng chawitir theih an ni ang.
Quarantine-a awm mekte zingah inkaihhruaina zawm lo, midang himna ti derthawng zawnga che te chu Rs. 500/- chawitir an ni a, Central leh State sorkarin Covid-19 dona tura inkaihhruaina a siam leh mipui kharkhipna thupek a siam te zawm duh lo chu Rs. 1,000/- chawitir an ni ang.
Pawisa chawitir thei tura tarlante hi Executive Magistrate te, sorkar hnuaia dan leh thupek kengkawhtute, police te, State level, District level, Local level leh Village level-a Task Force Chairman, Vice Chairman leh Member Secretary te an ni a, Ordinance hnuaia dan bawhchiatna tarlante hi non cognizable offence a ni a, dan bawhchhetu chu man an nih hmain Magistrate-ah man phalna warrant lak hmasak a ngai tihna a ni.
