Pu Zodintluanga hian ‘COVID-19 dona kawnga Mizoram sorkar tha tih chak nana hmala tura ngenna’ tih lehkha hi vawiin chawhnu khan Larsap hnenah a thehlut a, COVID-19 vanga Mizoram pawna Mizoram mi leh sa tangkhangte chhawmdawlna chungchangah sorkar hmalakna an duh khawp lo tih a sawi a, Mizoram Chief Minister hnena rawtna an thlente’n ngaih pawimawh a hlawh lo a ni a ti.
Pu Zodintluanga hian April ni 8 khan Congress president Pu Lal Thanhawla chuan CM hnenah lehkha thawnin, India ram hmun hrang hranga Mizo tangkhang mekte chhawmdawlna pe turin a lo ngen tawh a ni a ti a, data lak-khawm leh an awmna state sorkara tanpui tura ngenna lehkha DO Letter hmanga thawn bak tun thlengin hmalakna a la awm lo a ni a ti. Larsap hnena lehkha a thawnah hian April ni 16 thleng khan State danga tangkhang hi mi 2576 chhinchhiah an ni tih a sawi a, chhinchhiah loh engemawzat an awm tura ngaih a ni a ti a. Heng zingah hian pawisa nei tawh lo, ei tur pawh nei mumal tawh lo engemawzat an awm mek a, chhawmdawlna pek chu thil hmanhmawh thlak tak a ni a ti.
Pu Zodintluanga sawi danin Hmarchhak State thenkhat in state danga an mi leh sa tangkhangte hnenah \anpuina a pe a, Manipur chuan mi 3771 hnenah Rs. 2,000/- theuh a pe tawh a. Sikkim-in Zirlai tangkhangte Rs. 5,000/- theuh a pe tawh a, Meghalaya in an state mi tangkhangte Rs. 3,000/- \heuh pek tur thu an puang a;, Arunachal pawhin Rs. 3,500/- pek an nih tur thu a puang a ni.
