He Dan thar hi tun thla ni 4 atang khan hman tan a ni a, Mizoram pumah he Dan hnuaia pawisa chawi theihna tarlan chi hrang hrang bawhchhia mi 4660 man an ni tawh a, an pawisa chawi tlingkhawm chu cheng nuai 10 sing 3 leh za 3 a tling tawh a ni. He dan hnuaia pawisa chawi tlingkhawmte hi DC tin kaltlangin, sorkar sum bawmpuiah chhunluh thin a ni.
District hrang hrang zingah Aizawlah dan bawhchhia man an tam ber a, 2444 man an ni tawh a, Lunglei in dawtin 330 man an ni tawh a, Dan bawhchhe man tlemna District pahnih Khawzawl leh Kolasib ah te chuan mi 60 bawr ve ve man an ni.
Covid-19 dona Dan thar Mizoram sorkarin ordinance hmanga a hman-ah hian vantlang hmuna hmaituamna vuah lote Rs.100/-, social distancing zawm lote Rs. 200/- leh vantlang hmuna chil chhak te Rs. 300/- chawitira hrem theih an ni a, heng bakah hian Dan bawhchhiatna dang cheng 5000 thleng chawitira inhrem theihna te pawh a awm a ni.
