Covid 19 hri leng vanga Mizoram mipuite ni 58 zet kharkhip an nih chhungin Chief Minister in Lengpui Airport siamthat mek chu mipui hriatah tum 3 ngawt a tlawh tawh tih Congress thalai hian an sawi a. Hetih lai hian ramria VLTF te, Volunteer duty-te, Police duty leh damdawi lama thawkte ngaihvenin CM chu vawi khatmah a la zinchhuak lo thung a ni an ti a, COVID-19 veite enkawlna tur bika ruat Falkawn Referral Hospital takngial pawh a la tlawh lo nia sawiin, mak an tih thu an sawi.
Congress thalai hian kumin March ni 1-a Lengpui Airport-a IndiGo thlawhna service thar lawmnaah CM Pu Zoramthanga chuan, Airport airport mawi ber leh cute ber siam tum a nih thu a lo sawi tawh tih an sawi a, hei hi tihhlawhtling turin, runway cute ber atanga siam tan a tum mek nia an ngaih thu an sawi a. CM chu a kum a upat deuh tawh avanga che chhuak ngam loa an lo ngaih lai a, ngampa taka Lengpui Airport tum 3 ngawt a tlawh ngam leh si chu mak an ti hle tih an sawi. Finance Minister nih angin Mizoram sorkar sum dinhmun hre lo mah se, hetiang taka a ngaihpawimawh Lengpui Airport runway siamna senso tal chu a hre tura an ngaih thu Congress thalai hian an sawi a, Lengpui Airport a tlawh fo rual hian Lengpui bul mai, Lengte rama Mau hardening-na hmunpui pawhin nasa taka hma a sawn phah an beisei tih Congress thalai hian an sawi.
