Covid-19 hrileng mekah Kolkata Mizo Task Force on Covid-19 in Chief Minister Relief Fund atanga tanpuina an dawn chu tangkai takin an hmang tih an sawi a, an sum dawn hi tangkhang zawng zawngte hnena pek tur ni lovin, tanpui ngaite tanpuina atana hman tur a ni tih an sawi.

Calcutta Mizo Welfare Association (CMWA) hnuaia din, Kolkata Mizo Task Force hian Mizoram House pawn lamah mikhual tangkhang in report 477 an awm tawh tih an sawi a, CM Relief Fund an dawn chu tangkhang zawng zawngte tan a daih dawn lo a, tanpuina mamawh tak tak, ei leh bara harsatna nei te, inluah man leh thlenna man tur nei lo te, hriselna lama harsatna tawk, inenkawlna nei lo te tanpuina atana hman a ni ang tih an sawi. Kolkata-a tangkhangte zingah chhungte pur tur nei te chu midang, a mamawh zawkte kian turin an ngen a ni.