Tlabung SMO Dr. R Lalnienga chuan, Tlabung damdawi inah ramdangmi inentir an awm loh nan kumin April ni 25 khan thuchhuah siamin, India khua leh tui an ni tih nemnghehna lehkha keng vek turin inentir turte a hriattir a, Mizoram Chakma Alliance Against Discrimination tia invuaha an president Paritosh Chakma chuan, he thuchhuah hi Chakmate dikna leh chanvo rahbehsak tumnaah puhin, Indian Medical Association leh National Commission for Women bakah, National Commission for Protection of Child Rights-ah a zualko ta a ni.
Hemi chungchangah hian National Commission for Women chu inrawlh nghalin, thil awmdan chhui chiang turin Mizoram Sorkar a hriattir a, hemi nghawng kal zelah hian vawiin khan Khawthlangtuipui Group YMA hruaitute chuan SMO-hi a chenna inah kawmin thil awmdan an sawipui a, mipuite himna tura thuchhuah a siam chu tun dinhmunah thil pawimawh berte zinga mi nia an hriat thu te, an thlawp tlat thu leh a lama an tan tlat te, thuchhuah a siam avanga harsatna a tawk a nih chuan, a thlavang hauh tura a tul anga chet lak an inpeih reng thu te an hrilh a ni.
Hetih lai hian Central Young Mizo Association president Pu Vanlalruata leh MZP Gen. Hqrs president Pu B Vanlaltana-te chuan, Tlabung SMO thuchhuah chu thil tih awm tak a nih thu leh, mipuite himna tura thil tul tawpkhawk a nih avanga an thlawp tlat thu, Tlabunga Zonet reporter zawhna chhangin an sawi a, YMA Sub-Hqrs. Lunglei Secretary Pu Ngurthansanga Sailo pawhin, Tlabung SMO-in mipuite himna tur thu a chhuah vanga hêk a tawk chu pawi a tih thu leh, ramdangmite tan lo chuan ngaimawh tur awma a hriat loh thu a sawi bawk.
