December ni 22-a tlangkang vanga Tsunami rapthlak takin Indonesia a nuai hnuah Anak Krakatau tlangkang chu chhiatna nasa zawk thlen leh mai thei tur dinhmunah a ding leh mek.

Tlangkang thlenna bulhnaia khualzin phur thlawhna thlawk zawng zawng chu kawng dang zawh tir vek an ni a, boruaka kilometre 5 bial chhung chu tlawh pawh phal loha khar vek a ni bawk. Indonesia disaster management agency chuan tlangkang hlauhawm dan sawina chu level two a\angin level three ah a kai chho tih an sawi a, tlangkang hi a la inphuhchhuak chhunzawm zel a ni. Inrinni kalta-a tlangkangin Tsunami a thlen avangin mi za tel tam tak an thih phah a, Tsunami rapthlak tak khan Sumatra leh Java thliarkar te nuaiin, mi 430 an thi a, mi 150 vel chin hriat lovin an la bo mek bawk. Tsunami hian chenna in tam tak a tih chhiat bakah khualzinte tlawh nasat \hin hmun langsar tak takte a ti chhe hneh hle a, tun dinhmunah mi sing 1 sang 6 vel zet chu chenna in nei lovin an la awm a, chhanchhuah hna thawktute chuan hmun kilkhawr zawka tangkhang mekte chhanchhuah tumin an la bei chhunzawm zel a ni. Chenna in nei lo te hi Biak in leh zirna inah te tawmhul lailawk tir an ni a, January ni 4 thleng khian Indonesia sorkar chuan emergency a puang a ni.