Sheila Dixit hi Delhi-a Congress hotulu nilai a ni a, Lok Sabha inthlanah khan Northeast Delhi constituency-ah Congress ticket-in a chuh a, a khingpui BJP party Manoj Tiwari a hneh lo a ni.
Rahul Gandhi chuan Sheila thih thu hian a \hawng hle tih a sawi a, Congress party fanu chuam chu a ui thu sawiin, amah nen an inkungkaihna a \hat thu a sawi a, a kalsan tak a chhungte a tawrhpui thu a sawi a, Delhi CM term 3 chhung chelhtu thih thu chuan Delhi khawpui a nghawrnghingin a ti lungngai a ni a ti.
Prime Minister Narendra Modi pawhin Sheila Dixit chu mi ngilnei, nelawm leh kawm nuam tak a ni a ti a, Delhi khawpui hmasawnna turin \hahnemngai takin hna a thawk a, a uihawm tak zet a ni a ti a, a chhungte leh amah thlawptu leh \antute chu a tawrhpui thu a sawi a ni.
President Ram Nath Kovind pawhin Sheila Dixit a ui thu twitter-ah a ziak a, a hunlai khan Delhi khawpui nasa takin a thlak danglam a, hei vang hian Sheila chu hriatreng a ni tawh dawn a ni a ti.
Arvind Kejriwal pawhin Delhi khawpui hmasawnna tura Sheila Dixit hmalakna zawng zawng chu Delhi-in a hre reng tawh dawn a, a thihna chu Delhi tan chuan channa nasa tak a ni a ti a, thla muang taka chawl turin duhsakna a hlan a ni.
Sheila Dixit hian kum 1998 a\anga 2013 thleng, term 3 chhung Delhi Chief Minister nihna a chelh a, kum 2004-ah Kerala Governor atan lakluh a ni a, amaherawhchu thla 6 hnuah a bang a. Kum 1984-a Uttar Pradesh-a Lok Sabha inthlanah MP atan thlantlin a ni a, Prime Minister Rajiv Gandhi leh a cabinet minister te nen an thawkho a ni.
