Doklam vanga buaina chungchangah Japan-in a ngaihdan sawi

Sikkim-Tibet-Bhutan intawh khawmna laia Doklam-a India leh China inep mekna chungchangah Japan sorkarin thil awm dan pangngai chu sipai chakna hmanga tihdanglam tumna a awm tur a ni lo, a ti a, China chu tharum hmanga thil awm dan thlak tumah ngaiin, tha a tih loh thu a sawi. Doklam chungchanga buainaah hian inhnuk hniam zawk an awm loh avangin khawvel titi leh buaipui a tling tawh a, mi thiamte chuan China-in a ram chhunga a chhal, Doklam-a sipai dah a tum chu China tan a that an ring lo a, a thil tih avang hian US leh Japan-in India an tan ngei an ring a ni. He buaina hi muanawm taka ching fel tura US-in ram pahnih hi a nawr hnuah, Japan chuan vawiin khan hemi chungchangah hian a ngaihdan tlang taka sawiin, China-in a duh dana thil kalpui a tum ngawt chu thil dik ber a ni lo tih a sawi a, Japan sorkar palai, Kenji Hiramatsu-a chuan Doklam hi China leh Bhutan-in an inchuh tih an hriat thu leh, India chu Bhutan nena inremna an lo siam tawh avang chauha inrawlh a ni tih an hriat thu a sawi a, External Affairs Minister, Sushma Swaraj-i’n he thil hi a muanawm thei ang bera chin fel a duh thu a sawi chu tha a tih thu a sawi bawk. China-in Bhutan ram chhung, Doklam-a lamlian sial a tumna chu India leh Bhutan nena an thuthlung bawhchhiatna a ni tih India-in a sawi thin chu Japan hian a pawm nia ngaih a ni a, China kawngpui sial tum hi India sipaiten thla hnih kal ta khan an dodal tawh a ni. United States pawhin Hizbul Mujahideen pawl leh an hruaitu, Syed Salahuddin chu mi hnawksak leh a firfiaka che-ah a ngaih thu a puan avangin, hei hi Pakistan leh a thlawptu, China tan chuan a lawmawm loh hle rin a ni. Vawiin khan China chuan Doklam chungchangah hian Japan-in India a tan a nih pawhin, a duh duh sawi ve mai lo turin a hrilh a, Chinese Foreign Ministry thupuangtu, Hua Chunying-i chuan, Japan hian India thlawp a duh tih a lang a, mahse thil awm dan hre chiang lovin engmah a sawi mai mai tur a ni lo tih sawiin, thil awm dan tihdanglam tumtu chu China ni lovin, India ni zawkin a sawi a ni. Hua-i chuan Doklam atanga a sipaite hnuk kir thuai turin India chu a phut nawn leh a, helai bial chungchanga buaina chin fel nana awmze neia inbe thei tur chuan, India hian thu delh kilh engmah awm lova a sipaite a hnuh kir phawt a pawimawh niin a sawi.