Doordarshan-in Tripura CM thusawi an tichhuak ngei niin sawi

Doordarshan-in Independence Day-a Tripura CM thuchah chu an tichhuak ngei niin an sawi a, puan tawh angin, Tripura CM, Manik Sarkar chuan Independence Day-a mipuite hnena thuchah a sawi tur chu Doordarshan leh All India Radio-in siam tha leh turin an ti nia sawiin, an tichhuak ta lo nghe nghe niin a sawi a, an thil tih dan chu a duh loh thu a sawi a ni. Doordarshan erawh chuan CM thusawi hi Independence Day zan dar 7-ah khan an tichhuak ngei niin an sawi. Nimin khan Agartala Doordarshan Kendra hotu, UK Sahoo chuan thuchhuah siamin, he Kendra-a news unit-in CM thusawi pawimawh zual lai leh hmasawnna hnathawh dan a sawite chu an puan bakah, Independence Day-a CM-in mipui hmaa thuchah a sawi leh a kaihhnawih thilte chu minit 29 leh second 45 chhung a puang niin a sawi a, CM thusawi pawh minit 12 chhung tihchhuah niin a sawi. Mahse Doordarshan hotu hian CM lungawi lohna, a hmaa a thusawi a record tawh, Doordarshan leh AIR hotuten siam that an phut chu tihchhuah a nih leh nih loh a sawi lo a, state sorkar hotute chuan CM thusawi, record sa hi chu tihchhuah a ni ta lo niin an sawi a, CM record sa hi chu minit 6 chauh nia sawiin, Prasar Bharati hian CM lungawi lohna chungchang peh helin, thil dang an sawi daih niin an sawi.