Minister of State, Dr. BD Chakma-a’n Council of Ministers atanga banna a thehluh chu CM thurawn angin Larsap, Lt. Gen. Nirbhay Sharma-a’n a pawm. Raj Bhavan atanga Zonet thu dawn danin, Dr. BD Chakma-a banna hi vawiin chawhma dar 11 vel khan Larsap hian a pawm a, hemi atana lehkha pawimawh tihfel ngaite chu vawiin vek khan Chief Minister Office-ah a thawn nghal a ni. Puan tawh thin angin, Minister of State, Dr. BD Chakma hian National Eligility cum Entrance Test, 2017 hnuaia Mizoram Quota-a MBBS leh BDS zir tura thlan zinga Chakma zirlai 4 chu a chhan awm lovin Mizoram sorkar-in hnawl a tum nia sawiin, hei hi a tan pawm theih a ni loh thu leh, chi leh sakhaw inthliarna rawng kai zawnga thil tih chu a pawm theih loh thu sawiin, Thawhtanni kal ta khan CM, Pu Lal Thanhawla hnenah a banna a thehlut a, hemi chungchang hi CM, Pu Lal Thanhawla hova Congress Party MLA leh hruaitu thenkhatin an sawiho hnuah hemi ni vek, tlai dar 5 velah CM, Pu Lal Thanhawla chuan Minister banna hi a lo pawm atan Larsap hnenah a thawn a ni.
