Durtlang khawthleng YMA Joint Action Committee-in an khaw thlenga thuziak intar, AMC-in a tihchhiate chu tun thla ral hmaa siam that leh an phut a, hei hi a hlawhtlin loh chuan a tul anga bawhzui an tum thu an sawi. Durtlang khawthlenga YMA Branch 3 – Durtlang, Leitan leh Durtlang North Branch YMA Joint Action Committee hian nimin chawhnu khan tun hnaia an khawthlenga fakna leh thuziak intarte tihchhiat a nih chungchang hi an ngaihtuah a, an khawthlenga thuziak hrang hrang intarte chu Aizawl Municipal Corporation-in khawtlang mipuite hriattir lawkna leh hrilhfiah hmasakna awm mumal lovin, August ni 30 khan duhdah tak leh zah pah lek lovin an thairang nia sawiin, pawi an tih thu leh thinrimthlak an tih thu an sawi a. An vengchhunga kohhran leh pawl hrang hrangin sum leh tha tam tak senga an siam, thawk leh khata thaichhiat vek a ni chu tha lo an tih thu sawiin, AMC-in thuziak a tihchhiat zingah mimal ram chhunga thuziakte, sawrkar hmun pawimawh leh Zirna School hriattirnate, Home leh Centre hmun hma inkawhhmuhnate, veng chhung kawtthler leh hmun pawimawh bik tarlanna, vengchhung leh veng pawn miten an chhawr tangkai lai niin an sawi a, thaichhiat zinga a tam zawk chu AMC danin a huam loh nia sawiin, tihchhiat a nih hnu, tun thla ni 1-a AMC in tualchhunga chanchinbu-a chhuah tur hriattirna a pe hnuhnawh niin an sawi a, intham lohna leh hmuhsitna nia an ngaih thu an sawi.
Puan tawh angin, Aizawl Municipal Corporation (AMC) chuan AMC Display of Advertisement and Hoarding Regulation, 2013 tlawh chhanin August ni 28 atang khan AMC huam chhunga phalna tel lova fakna leh thuziak, Hoarding, Banner leh Poster tarte a senghawi a. A bultanna atan August ni 28 atang khan Ward No. 1 huam chhung, Durtlang leh a chhehvela Hoarding, Banner leh Poster tarte chu enfiah tanin, phalna tel lova tarte chu rawng senin ‘X AMC’ tih ziah hnan zel a ni a, hei hi AMC-ah phalna la tura hriattirna ang a nih thu AMC hotute chuan an sawi a ni.
