Thawhlehni-a BJP president Amit Shah-a road show neihlaia buaina a chhuah hnuah Election Commission chuan West Bengal-ah Lok Sabha inthlan thawh 7-na atana campaign hun chu zanin dar 10-ah titawp a ni ang tih a puang a, State Principal Secretary Atri Bhattacharya leh CID-a Additional Director General Rajeev Kumar te a sawn bawk a ni. EC chuan buaina chhuakah hian Ishwar Chandra Vidyasagar-a lim suasam a ni chu pawi an tih thu an sawi bawk.
BJP President Amit Shah leh PM Narendr Modi te chuan buaina chhuakah hian West Bengal Chief Minister Mamata Banerjee party, TMC te inrawlhah puhin, Ishwar Chandra Vidyasagar-a lim pawh hi TMC worker te tihchhiat a ni an ti a, Modi chuan mipui te hnenah hetilai hmunah hian Ishwar Chandra Vidyasagar-a lim ropui tak din leh a tiam bawk a ni.
EC in campaign theih hun a tihtawp hun hi Modi campaign tawp hun nen a inmil chiah avangin Mamata Banerjee chuan an hmalakna chu ram rorelna dan kalh leh thlei bik neihna a ni a ti a, eptu pawl te’n Mamata Banerjee lam \angin an \awng chhuak bawk. Congress thupuangtu Randeep Singh Surjewala chuan EC chu ram rorelna dan hnuaia a tihtur kalsana BJP party thuhnuaia awmah a puh a, Amit Shah-a chu Kolkata-a buaina tichhuaktu-ah a puh bawk a, Election Commission rorel dan kalhmang chu endik a ngai a ni a ti. BSP hotu Mayawati chuan Amit Shah leh BJP hotute chu Mamata tihhmingchhiat tuma phiarru-ah leh he buaina hi ruahman lawkah a puh a, an thil tihdan chu PM tih awm loh tak a ni tih a sawi bawk. Mamata Banerjee chuan eptu pawlten lungrual taka an thlawp avangin an chungah lawmthu a sawi a ni.
