ECJ Judge te chuan Britain hian EU-a a dinhmun pangngai luah chhunzawm chungin a duh anih chuan EU chhuahsan tura ruahmanna a lo siam tawh chu a hnuk let thei ang tih an nemnghet a, Britain inlak hran duh lotu Politician te chuan intiamkamna engmah awm lovin Britain hi a inhnukdawk leh thei tur a ni tia an \an laiin, Britain sorkar leh EU member dangte chuan hei hi an pawm lo thung a ni.
Naktuk maiah hian MP te chuan Britain inlak hranna tur Brexit tia sawi chungchangah hian vote an thlak dawn a, Prime Minister Theresa May-i ruahmanna siam hi MP tam takin an pawmpui dawn lo nia hriat a ni.
ECJ Judge te chuan EU-a tel ramte zingah inlak hran duh an awm anih pawhin, a taka an tihpuitlin hma chuan an rilru an thlak leh thei a ni an ti a, hetihlai hian thutlukna reng reng chu mipui rorelna kalphung Democracy kalh lova siam a ni tur a ni an ti thung.
