Kum 2015 March ni 10-a Ganja Kg. 30 man neitua puh, F. Lalbiakhlui, Dawrpui Vengthar chu Special Court (Narcotic Drugs and Psychotropic Substances Act)-in kum 10 chhung lung in tang tur leh cheng nuai 1 chawi turin a hrem. Addl. Public Prosecutor, Pu H. Lalmuankima hnen atanga thu dawn danin, Ganja Kg. 30 hi Special Narcotic Staff-ten kum 2015 March ni 10, chawhma dar 11:30 khan Phunchawngah an man a, a neitu puh, F. Lalbiakhlui, Dawrpui Vengthar hi a tuk, March ni 11-ah manin, ND&PC Act tlawhchhana thubuai siamsak a ni. Ganja mante hi New Secretariat Complex-a Forensic Science Laboratory-ah endik a nih hnuin ruih nana hman chi a ni tih finfiah a ni a, a neitua puh, F. Lalbiakhlui chungchang hi Court-a ngaihtuah tura thawn nghal a ni. He thubuai ngaihtuahnaah hian F. Lalbiakhlui hian Ganja hi hralh chhawn tura Champhai atanga a lak a ni tih finfiah a ni a, Special Court (Narcotic Drugs and Psychotropic Substances Act) chuan hrehawm taka kum 10 chhung tang tur leh cheng nuai 1 chawi turin a ti a. A pawisa chawi tur hi a pek theih loh chuan kum 1 dang a tàn belh ang. Special Court hian F. Lalbiakhlui kut atanga Ganja Kg. 30 man hi a rang thei ang bera tiral nghal turin Police-te a hriattir bawk.
