Tun BCM Kohhranin an thurel, Chakma leh Bru zinga bawngbawlna kalpui chu zawi zawiin tihhniam tura rel thluk chu Pathian pawi kan van sawi nasa dawn em. Kan Pathianin thu min chah, chanchin tha chu (ram tinah kal ula, chanchin tha hril rawh u) tih chhang ngamtu hnam ni tawh a, hnam tin chi tin hnenah hrilh kim hma lo zawng a tih a nih kha. He rawngbawlna duhawm tak hi hnam chimral hlauh vanga politics leh a hnam zawnga lak a nih vaih chuan Zoram hi Pathian thinurna nasa tak hmachhawn tur kan nei ang tih tunge sawi thei? Kawng hrang hrangin min hmuh tir zel bawk a ni lo’m ni? State leh ramdang hmuhah pawh Kristian za-a za kan tih ngam ngat hian a chhe lamah chuan a sang fal nalh zel mai si a, hawh u, hnam chhan nan hi chuan Kohhran zawnga tih chi a ni lo tih hria ang u. Mahni theuh kan pawimawh zawk.
8414007418
—————
Zawlpala leh Tualvungi thawnthu-a, ropuina leh hausakna um avangin Bangladesh Lushai Hills tuna Chakma home land an tih tak leh Zoram khawthlang Mizo khua tam tak chu Chakma-te kan luah tir chu a ni ta mai a, mahse koh thiam inzawn siak ringawt leh ar anga inchhung atanga hnawt ringawt lovin, kawngkhar bulah i awm mai ang u, dan leh dun a ngai lo e.
Tlabung Ui tang rual
————–
Pathian a tel loh chuan tuarna leh harsatna-in a hneh ang che. Pathian a tel erawh chuan tuarna leh harsatna vek chuan a tichak ang che.
Angaihtei Lungsum
————–
Kan Home Minister-in Police lak turah a tling leh tlakte chauh kan la ang a ti hian kawh pakhat a neih chu tun hma zawng khan an lo lak danah duhsak zawngte kha lak an lo ni thin tih a chiang a. Kan sorkar kal mek leh kal tawh te-ah induhsak uchuak hmuh tur a awm vek. Zirtirtu leh Police hi ram darthlalang leh sorkar leh ram tihmingtha-a tihmingchhe thei an nih avangin tling leh tlak chauh lak a tha. He thil dik lo hi kan ramin kan tuar mek a nih hi.
RK Sanga
————-
Hman zan ZONET fiamthu huanga UPC rawn sawitu kha a mawi lo zawnga UPC upa i rawn sawi kha ila inhria anga, UPC hi fiamthu thawh nan ding kan ni lo tih i lo inhre tawh dawn nia.
RC-a, Nursery
————-
Enga tinge kan ram min hruai tawhtute hian kum 40 chuang mahnia ro inrela kan awm tawh hnu pawha India ram State pachhe ber leh intodelh lo berte zinga min chhuah mai le? Bei a va dawng thin em. Hawh teh u, Zofate u, ram hruaitu hi i duhtui tawh teh ang u. Sum leh paia mi hmelhem ngatte phei hi chu thinhrik nachang hria ila, ram eichhetu an ni e. Hruaitu tha kaihhruaina hnuaiah Zoram hi i parvul tir leh ang u hmiang.
Zo Putar
—————
Tangrual Pawl ZPM-te Policy leh Constitution pawh induan fel hma hauha Champhai Zion Venga VC in han nei ta mai hian Zoram mipuiten rorelna dik leh kalphung thar an thlakhlelh zia a lan chiantir hle mai, duhsakna kan hlan a che u. Kan ram hi zu bawih leh tangka sum ngainatna bawih atanga hruaichhuak tur leh thatchhiatna tobul SUM SEM ching hote laka humhim tur hian nangni lo chu beisei tur kan nei ta lo. Keini thingtlang lam pawh hian beiseina sang tak nen kan thlir reng a che u. ZPM full support kan pe a che u!
Lalvala leh a thiante, Hrangturzo Const.
————–
Prime Minister leh thubuai hla buai remtu (Magistrate) nihna kengtu chu Pa hi a ni a, chhungkaw sorkarna ngaihthah vang leh hleih nei taka rorelna avangin chhungkaw kehchhiatna a thleng thei a, a mawhphurhna hi a sang em em a ni. Pa rorelna tipuitling tura lo thlawptu pawimawh em em leh sum leh pai, ei leh in kawnga renchem thiam taka enkawltu (Finance Minister) chu Nu hi a ni a, sum leh pai enkawl a thiam loh avangin chhungkaw khawsak a buai vek thei bawk a, nu leh pa mawhphurhna hi a sang em em a ni. Inthlahdah thei an ni lo. Chuvang chuan kei chuan a thu khaikhawm nan tiin “CHHUNGKAW INSORKARNA” tiin ka kai tawi mai a ni. Hei vang hian tu chhungkua pawh hi inang khat veka siam kan lo ni tihna a nih chu. Kan Indian dan bu-ah pawh dikna chanvo a hran ngata nei vek kan ni a, chuvang chuan Independent sorkar chu kan ni ve a ni lo’m ni?
C. Lalmalsawma, Aizawl TNM Field Veng
————–
Party te tak te te ZNP, MPC, ZPM te inzawmkhawm hian khawvel leh India ram kalphung hi thlir thiamin an sorkar huna an hotu lu ber tur an puang lo a nih chuan mi rin an kai dawn lo. Congress leh MNF hamthatna siamtu mai an ni palh ang tih ka hlau hlel love.
Milari pa
————-
ZONET U Got Talent show hi a tha thlawt, ti zel ru. Tin, Yamaha Fiamthu Fest hi a that rualin zu hi Jugdes te hian an palzam deuh em? Zu rui chung hi chuan contestant te hi perform tir phal loh ni teh se, mit tikham an awm nual mai.
9436147113
————-
Party te khaw tina Unit pawh nei lo, ZNP leh MPC te thawhpuia, ZPM dina Tangrual Pawl invuah ho hi lo lal ta se, tunge CM tur ni ang? Anmahni ngei pawh hi engamah hma-in an buai nghal a ni lo maw? Mipui lam atangin CM tur puang tura rawtna a tam hle si. Khawvel ram tin leh India ram ngei-ah pawh a lu ber tur puan lawk hi tih dan a ni tawh e.
VL Ruata
————–
Central YMA hruaitu thlan boruak thianghlim tawk lohna chu Vanglaini chanchinbu-ah khan kan hmu a, engnge a chhan ni ta ang tiin ka ngaihtuah zui a. Hruaitute hi politics game hmasaa hmangin YMA hi an hmang emaw tih mai tur hian an awm a, sorkar hnathawh laia hlawh phu lova hausa retired te ZPM atangin an han inhampuar ve hnuhnawh a nia!! Pastor nih laia thlarau mi vak lova hriat te nen sorkar siam an tum si a, kan ram hi thim hian min hmuak reng mai zawng a ni e.
LB-a Pa
————-
To,
Pu Chhuanliana BVT,
Sub :- THIH CHHAN leh THIHNA CHHAN.
Lal Isua khawvela a rawn THIH CHHAN chu mihring te suala tlu hnu rawn chhanchhuah leh hi a ni.
Lal Isua khawvela a rawn THIHNA CHHAN pawh mihring te suala tlu hnu rawn chhanchhuah leh tho hi a ni.
Mi an lo thi a, TV scroll-ah THIHNA CHHAN kan tih thar vel hi thil tul lo tak a ni. Mizo tawnga kan lo hman than dik lohna awm chuang lo THIH CHHAN hi i hmang chhunzawm zel zawk ang u.
THIHNA CHHAN a NA lai tak hi mawi kan tih viau chuan
VUI HUN tih aiah VUINA HUN,
THIH HUN tih aiah THIHNA HUN
te pawh tih tawh ila.
Arte THIH CHHAN chu rah palh vang.
Arte THIHNA CHHAN pawh rah palh vang.
Indo chhan – Indona chhan, Tah chhan – Tahna chhan,
ka NUIH CHHAN chu Liani vawih vang, ka NUIHNA CHHAN pawh Liani vawih vang.
Vanmihriata
—————
