Indian Medical Association, Mizoram Chapter-in Falkawna State Referral Hospital bula IMA Multipurpose Centre an sak tur lung chu vawiin khan Health Minister, Pu Lal Thanzara’n phum a, tun hnaia Medical Council of India aiawhten Mizoram-a Medical College din tur an tlawhna report an pe tawh nia sawi leh, thu dik lo tam tak, social media hmanga thehdarh nia sawiin, Inspection Team hian an Report hi an la thehluh loh bakah an report hi thuruk a ni a. Report an pe nia sawi chu thu dik lo a ni, a ti bawk. Health Minister chuan Medical College hlawhtlinna atan beiseina sang tak nena bawhzui mek nia sawiin, kum 2018-2019 ah chuan First Batch admit theih beisei niin a sawi a. Indian Medical Association, Mizoram Chapter-in State Referral Hospital, Falkawn bulah IMA Multipurpose Centre sak an tum chu lawmawm a tih thu sawiin, sorkar pawhin a thei ang anga tanpui dan tur a zawn tur thu a sawi a ni. IMA Multipurpose Centre lungphum inkhawm hi IMA Mizoram State Branch President, Dr. Vanlalruata Ralte-in a kaihruai a. He Centre hi chhawng 6-a sak tum a ni a, Conference Hall, thlen in leh thil \ul dangte dah tum a ni. IMA hi India ramah doctor-te intel khawmna pawl lian ber a ni a, member 2,15,000 vel an nei a, Mizoram pawh member 700 chuang an nei a ni.
