ZMC Covid 19 Testing Laboratory-ah hian April ni 7 atang khan Covid-19 hri kai leh kai lo hi endik tan a ni a, a tir lamah chuan hri kai rinhlehte sample chauh endik thin a ni a. State pawn atanga Mizorama lo hawte pawh Rapid Antibody Test (RAT) hmanga an dinhmun endiknaah Reactive leh inrinhlehna neite chauh RT-PCR hmanga an Sample endik thin a ni a. State pawn atanga lo haw, Kolasib District-a Thingdawl Quarantine Centre-a awm, hri kai inrinhlehna nei lote Sample endiknaah Covid 19 an kai tih June ni 1 khan hmuhchhuah a nih tak avangin Sorkar chuan kalphung a thlak nghal a, Laboratory-a Sample endik hi a ni telin a pung a, ni khata sample 300 chuang endik tum-te pawh a awm ta a ni.
ZMC hotute hnen atanga Zonet thudawn danin, ZMC Covid 19 Testing Laboratory-ah hian Sample endiktu tur Microbiologist 3 leh an thawhpui mi 20 velin ni tin hna an thawk thin a. Tunah hian RT-PCR khawl hi Mizoram-in 2 a nei tawh a, District hrang hrang atangin Sample endik tur a lo thlen belh zel avangin an thawk rim hle a ni.
Sample an endik zinga thenkhat chu vawi khat aia tam endik nawn ngaihchang a awm thin a, hei hian hna a tih muan phah thin a ni.
