Vawiin khan Tourist Lodge Chaltang-ah Food Civil Supplies and Consumer Affairs Department chuan an Minister, Pu John Rotluangliana hovin, kum kal taa an hnathawh dan thlir letin, kumin kum thara an hmachhawp an thlirho a, Pu John Rotluangliana chuan kum 2017 February thla tawp lam atangin kumtluan deuh thawa ruah a sur chungin Department-in mipui mamawh, a bik takin buhfai tluang taka an sem thei chu lawmawm a tih thu sawiin, harsatna leh mualphona lutuk tawk lova kum kal ta an hmang tlingtla thei chu hnathawktute tanrualna leh inpekna vang niin a sawi. Boruak inthlak nasa avangin khaw chin chhut thiam a harsa tih sawiin, fur chhiat vanglaia mipuiin buhfai eitur an tlakchham lohna turin hemi hun chhung atana buhfai dahkhawl lam buaipui \an a \ul thu a sawi bawk.
FCS&CA Secretary, Pu H.L.Rochungnunga pawhin DCSO-te fuihin an bial chhunga thil thleng an hre hneh hle tur a ni, a ti a. Harsatna chin fel mai theih chu hotute thupek nghak lova hma la \hin turin a chah bawk. He sawihona-ah hian kum 2017 chhung khan District hrang hrang hnuaia Supply Centre 48-ah fur ruahtui tam laia mipui an tam loh nan thla engemawzat daih buhfai dah khawl lawk a nih thu sawi a ni a. Fur laiin khaw tam tak, kawng chhia avanga motor-a tlawh pawh theih lohten buhfai an dawn theih phah a. Kum 2017 chhung khan kum dang zawng aiin ruah tui a tam a, hmun kilkhawr zawk tlawh pawh theih loh tam tak a awm tih sawi a ni bawk a. Department-in Monsoon Stock Programme a hman avangin a hun takah mipuiten buhfai an lak theih phah a. Kuminah pawh Monsoon Stock hi chhunzawm ni se an ti a ni. He sawihona-ah hian DCSO-ten report pe in an bial dinhmun leh harsatna tawhte an tarlang bawk a ni.
