Food Civil Supplies & Consumers Affairs department hotuten tunlai hrileng Covid 19 vangin ei leh bar lamah harsatna a awm lo tih leh Mizoram thla thum ei tur buhfai chhek khawlsa a ni tih an sawi.

Supply Dept hotute hian Gas, Petrol, Diesel leh thil dangah pawh harsatna engmah a awm lo tih an sawi a, tunhnai tea ration buhfai sem a tlai hret chhan chu sorkarin thil thar, Supply Change Management System a kalpui vang zawk a nih thu leh sem zui mai tur a nih thu vawiina COVID 19 chungchang sawi hona ZONET-in a buatsaih-ah an sawi

Coronavirus, Covid-19 leng mek chungchang sawi honaah hian Covid 19 chungchanga bika sorkar aiawha thupuangtu Dr Pachuau Lalmalsawma chuan zin haw awm lohna leh zin chhuak awm lohna khuaah te chuan, hritlang khawsik an lo awm a nih pawhin Covid 19 vei ngawt theih a ni lo a, hlauh tur a awm lo a ni a ti a, A endikna khawl RTPCR chu State tam takin an nei bik lo a, Mizoram sorkar chuan he hri kai hmuh chhuah la awm lo mah se, lei tumin hma a la mek tih a sawi.

Mizoram Police hotu pakhat, AIG Northern Range Pu Lalbiakthanga Khiangte chuan Covid 19 chungchanga thudik lo thehdarhte chu police ten an umzui zel dawn tih a sawi a, Mizorama luh theihna hmun 38 awmah hmun 32 chu khar vek a nih tawh thu a sawi. ZONET in Covid-19 sawihona a buatsaihna hi zanin dar 8-ah ZONET Zawlbukah tih chhuah a ni ang.