Ek in ni lo, pawn lama inthiar awm tawh lohna tura tun thla ni 9 atanga ni 15 thleng, ram pum huapa beihpui thlak chu tukin khan Lunglei Venglaia Mizofed Office kawtah Dist. Bawrhsap, Pi Lalzarmawii’n a hawng a, kumin October thlaah Lunglei District chu pawn lama inthiar awm lohna District-a puan theih tum a nih thu sawiin, hei hi tihhlawhtlin tum turin mipuite a ngen a ni. Bawrhsap chuan Swachh Bharat Mission chu Prime Minister Programme pawimawh a ni tih sawiin, a hlawhtlin theih nan chak taka tan lak tum niin a sawi bawk. He inkhawmah hian kum 2012-a Baseline Survey report-a tarlan, Lunglei District-a inthiarna, Ek in nei lo chhungkaw 3,281 chu ek in saksak an nih tawh thu te, vantlang zun in leh bawlhlawh sawngbawlna hmun tam tak siam a nih tawh thute tarlan a ni. He inkhawm hi PHE Deptt. hnuaia Rural Watsan Division Executive Engineer, Pu Allan Lalthalura’n a kaihruai a,“Freedom from Open Defecation Week” hawnna a telte hian Lunglei Venglai atanga Bazar Veng thleng kawng an zawh a ni.
Serchhip-ah pawh tukin khan Bazar-ah pawn lama inthiar lohna tur a beihpui thlakna inkhawm neih a ni a, Sub-Headquaters YMA President, Pu R. Sanghmingthanga chuan, Serchhip District hi Mizoram laili-a awm, zin vei vak mi tam takin an pal tlang thin a nih avangin faina leh thianghlimna kawngah mi dangte entawntlak nih a tul thu a sawi a ni. He inkhawmah hian PHE Executive Engineer, Pu F. Lalsanglura pawhin thu sawiin, Swachh Bharat tihlawhtling tura tan lak a tul thu leh Mizoram chu kumin October ni 2 hma ngeia pawn lama inthiar awm lohna state a puan tum a ni tih a sawi.
Champhai-ah pawh pawn lama inthiar awm lohna tura beihpui hi vawiin khan thlak a ni a, Dawrkai kawn atanga Circuit House thlengin sikul naupang leh mipuiten kawngpuia bawlhlawh thenfai hnatlang an nei a, hemi rual hian pawn lama inthiar awm lohna tura inzirtir nghal a ni. Sub-Headquaters YMA President, Pu Lalbiakzauva chuan Champhai chu Mizoram-a District Headquarters zinga pawn lama inthiar awm lohnaa puan hmasak ber a ni tih sawiin, faina leh thianghlimna lama tan la chhunzawm turin mipuite a fuih a ni.
