Dr. Thangtea hian vawiin khan thuthar lakhawmtute kawmin, Covid 19 kai hmuh thar chungchang hi a hrilhfiah a, hri kai thar hmuh chhuahte chu fimkhur loh vang ni lovin State pawn atanga lo lut an ni tih mipuiten hria se a duh tih a sawi.
Health Minister tawiawmtu, Chief Secretary, Pu Lalnunmawia Chuaungo chuan tuna Mizorama inkharkhipna dan kalpui lai chu hri kai thar hmuh chhuah awm mah se, mipui tan him tawk tura ngaih a ni a ti a, tih danglam tul lova a ngaih thu a sawi.
Hetiang a nih mek lai hian, nizan lamah Covid 19 kai mi 12 hmuh thar an nih avangin vawiin khan Aizawlah chuan dawr tam zawk khar a ni.
Aizawla sumdawnna hmun pawimawh awmna veng tam zawk Dawrpui, Zarkawt, Chanmari, Bawngkawn, Chaltlang, Ramhlun leh veng engemawzatah chuan Local Level Task Force thupekin damdawi dawr tih loh dawr tam zawk chu khar vek a ni a, veng thenkhatah chuan dawr hi dan pangngaia hawn a ni thung. Veng thenkhatin an huam chhunga dawr an khar tir chhan hi hri leng kaihhnawihah mipui hlauthawngin ni tin mamawh thil chi hrang hrang an inchuh lohna tur leh mipui an chiai lutuk lohna tura ruahman a ni a. Hun kal tawhah mipui zingah mahni mamawh khawp aia tam ei tur leh bungraw chhek khawl an awm thin avang leh hei hian miharsa zawk leh a lei khawlna tur nei ve lo tan harsatna a thlen thin avangin, hetiang a thlen lohna tur hian he ruahmanna hi kalpui a ni.
Aizawla dawr tam zawk khar a nih avang hian khawpui chhunga lirthei vei vak pawh a tlem phah deuh a, veng thenkhata dawr inhawng chhunte pawh a lun hle a. Heng dawr-ahte hian chakkhai lam mipui thahnem tak an awm thung a ni. Traffic hotute chuan, chawhma lam khan lirthei chhuak tam deuh mah se, Traffic ti tawt khawpa tam lirthei chhuak a awm lo tih Zonet an hrilh a, chawhnu lamah phei chuan khawlai a thawl a, lirthei dan bawhchhia pawh an awm lo tih an sawi.
