HIV/AIDS darh zel tur ven kawnga thawh ho dan tur Mizoram State AIDS Control Society leh Synod hotuten vawiin khan Synod Committee Room-ah an sawiho. Sawi hona hmanpuitu Health Minister, Pu Lal Thanzara chuan, tuna Mizoram dinhmun thlirin HIV/AIDS ven kawngah chak zawka hnathawh a tul tih hriaa Kohhran hrang hrangin hemi lam hawi hmalakna tur an duang chu thil lawmawm tak a nih thu a sawi. Sawi honaah hian Synod Social Front puipate zinga mi Rev. B. Sangthanga’n HIV/AIDS dona kawnga hna an thawh tawh hrang hrang a tarlang a, Kawppui la nei lo te mipat hmeichhiatna kawnga fihlim tur leh kawppui nei tawhte tan rinawm tura intiamna an buatsaih thu te, AIDS natna chungchang inzirtirna lemchan te, Cartoon Comics leh campaign chi hrang hrang an buatsaih tawh thu te leh, HIV/AIDS chungchanga kaihhruaina bu an siam tawh thu te a sawi. MSACS Project Director, Dr. Lalmalsawmi Sailo chuan, Mizorama HIV hrik kai zingah vanduaina vanga kai tlem a zawng awm bawk mah se, nunchang kaihhnawih vanga kai an tam ber niin a sawi a. Kohhran chu mipui kaihhruaina kawnga hmala chak thei ber a nih avangin HIV dona kawnga ke pen a tum chuan an hnathawhnaah nasa takin a tanpui dawn tih a sawi. Dr. Lalmalsawmi Sailo chuan, ram dangah chuan HIV chu High Risk Group zingah a hluar a, Mizoramah chuan mipui mimir zingah a darh nasa zawk a ni a ti a. Tun hnai kum 2/3 chhungin Mizoramah damdawi hman sual a hluar nasa a, a man a tlawm bawk si avangin tleirawlte zingah inchiu thar an tam a, a ruka inchiu an nih avangin hriau an inhmantawm nasa a ni a ti bawk. He inrawnkhawmna hi Synod Moderator, Rev. F. Lalrinnunga’n a kaihruai a, Report atanga a lan danin, Sorkar kum kal mek 2017-18 chhungin Mizoramah HIV hrik kai thar mi 1505 hmuhchhuah an ni tawh a, ni tin mi 5 velin HIV an kai ziah ang a ni. HIV vei zingah kum 25 atang 34 inkar an tam ber a, kum 1990 atanga nikum November thla thleng khan thisen 6,52,760 endik tawh atangin HIV hrik pai mi 16,235 hmuhchhuah an ni tawh a, chung zinga 1,481 chu naupai thisen endik atanga hmuhchhuah a ni.
